Во Занаетчискиот дом во Куманово вечерва, со почеток во 19 часот, ќе се одржи манифестацијата „ЉУБОВ ЗА СИТЕ“, посветена на ликот и делото на прерано починатата македонска уметница Андријана Мациев.
Настанот, кој годинава се организира по 11-ти пат, за првпат ќе се одржи во Куманово и ќе понуди богата културно-уметничка програма во чест на уметницата, позната по своите ликовни изложби, перформанси, учества на ликовни колонии и хуманитарна дејност.
Во рамки на манифестацијата ќе бидат изложени 20 дела од трите ликовни циклуси на Андријана Мациев – „Живот во бои“, „Женски приказни“ и „Шарени вибрации – Разбуди се, погледни во сонцето и насмевни се“.
Пред посетителите ќе бидат промовирани и двата алманаха со наслов „ЉУБОВ ЗА СИТЕ“, создадени од повеќе автори инспирирани од животот и творештвото на уметницата.
Ќе биде претставена и третата автобиографска книга „ЈАС СУМ ЖИВА“, која Андријана ја пишувала за време на нејзината борба со канцерот, а по нејзината смрт ја довршила нејзината мајка. Книгата претставува лично сведоштво и животна приказна која, според организаторите, никого не остава рамнодушен.
Манифестацијата ќе ја води Јулија Мациевска, мајка на Андријана Мациев, која е позната како естраден уметник, новинар и ТВ водител.
Никола Ивановски