Тајландските власти објавија дека кај лилјаци е откриен нов сој на коронавирус, но досега не се пријавени случаи на инфекција кај луѓе.
Тајландското Министерство за дигитална економија и општество соопшти дека вирусот е пронајден кај лилјаци во покраината Чачоенгсао, нагласувајќи дека достапните податоци не укажуваат на непосредна закана за населението.
Според соопштението, досегашните тестови покажале дека станува збор за сој кој е помалку патоген и помалку пренослив од вирусот што предизвикува ковид-19.
Тајландските власти нагласија дека нема потврден пренос на луѓе и дека ризикот од ширење на епидемијата е оценет како низок.
Исто така, беше додадено дека вакцините против ковид-19 се сè уште важни за намалување на сериозноста на болеста, доколку се појават инфекции со сродни вируси.
На крајот на април, списанието „Nature“ објави истражување од меѓународен тим научници за коронавирусот CcCoV-KY43, откриен кај лилјаци во Источна Африка, кое во лабораториски услови покажа способност за користење на протеинот CEACAM6 како начин за влегување во човечките клетки. Овој протеин е присутен и во белодробното ткиво.
Сепак, научниците истакнуваат дека способноста за врзување со клеточен рецептор не значи истовремено дека вирусот може лесно да се пренесе меѓу луѓето или да предизвика епидемија.
Серумските примероци тестирани во Кенија не покажаа значајни докази дека вирусот CcCoV-KY43 веќе се проширил на човечката популација.
Затоа, експертите истакнуваат дека ваквите откритија се првенствено важни за раното следење на потенцијалните зоонози, односно вируси што можат да се пренесат од животни на луѓе, но дека во моментов нема основа за паника.
Тајландските власти изјавија дека продолжуваат да следат и дека јавноста ќе биде известена доколку се промени проценката на ризикот.