Претседателот на Соединетите Американски Држави, Доналд Трамп, изјави дека војводата од Сасекс, принцот Хари „не зборува во име на Велика Британија“, а ова го кажа откако принцот во Киев ги повика Соединетите Американски Држави да покажат „лидерство“ во однос на Украина.
За време на ненајавената посета на Украина, принцот Хари изјави дека САД треба да ги исполнат своите меѓународни обврски и дека нивната улога во глобалната безбедност носи трајна одговорност, „не по милост, туку заради стратешка стабилност“, објави Би-Би-Си.
Трамп, одговарајќи на новинарските прашања, иронично го коментираше настапот на Хари, велејќи дека „принцот не зборува во име на Велика Британија“, и додаде дека тој лично „зборува повеќе за Велика Британија отколку принцот Хари“.
Американскиот претседател во исто време рече дека го почитува принцот Хари, но не прецизираше дали ќе го покани на вечера за време на претстојната државна посета на кралот Чарлс III и кралицата Камила на САД.
Во истото обраќање, Трамп ги повтори своите ставови за енергијата и имиграцијата во Велика Британија, наведувајќи дека, според него, таа земја треба да го отвори Северното Море и да го промени својот пристап кон миграциската политика.
Посетата на британскиот монарх на Соединетите Американски Држави се очекува следната недела, а засега нема официјални коментари од Белата куќа и Бакингемската палата за изјавите на Трамп.
Трамп рече дека државната посета на британскиот крал и кралица следната недела би можела „апсолутно“ да придонесе за подобрување на односите меѓу Соединетите Американски Држави и Велика Британија.
Во телефонско интервју за Би-Би-Си, Трамп рече дека го познава кралот „добро со години“ и го опиша како „храбар и голем човек“, додавајќи дека неговата посета би можела да има позитивно влијание врз билатералните односи меѓу двете земји.
Британскиот крал Чарлс III ќе биде во четиридневна посета на Соединетите Американски Држави од 27 април, каде што ќе се сретне со американскиот претседател Доналд Трамп, во време на зголемени тензии меѓу сојузниците, при што Лондон очекува монархијата да придонесе за зајакнување на билатералните односи, објави претходно Ројтерс.