Најмалку 18 лица загинаа кога гумен чамец со мигранти потона во средата кај западната турска провинција Мугла, соопшти крајбрежната стража, додавајќи дека операциите за пребарување и спасување во областа продолжуваат.
Крајбрежната стража соопшти дека бродот со надворешен мотор бил откриен во 6 часот наутро по локално време кај брегот на областа Бодрум во Мугла и се обидел да избега и покрај постојаното предупредување да запре.
Бродот подоцна потонал поради неповолните временски и морски услови во областа, се додава.
Хеликоптер на крајбрежната стража и три брода се испратени во областа за потрага и спасување, соопшти крајбрежната стража, додавајќи дека досега спасиле 21 лице.
Во соопштението не е прецизирано од каде тргнал бродот и каде се движел.
Егејското Море е чест транзитен пат за илјадници мигранти кои се обидуваат да преминат од Северна Африка и Блискиот Исток во Европа, особено од Турција, која е домаќин на милиони бегалци од Сирија, Ирак и Авганистан.