Украина се соочува со сè поизразен ризик да остане без клучна воена и финансиска поддршка од Соединетите Американски Држави, поради несогласувања околу условите за продолжување на преговорите, објавуваат украинските медиуми, повикувајќи се на извори блиски до претседателската администрација.
Според тие изјави, барањето на Вашингтон украинските сили да ги повлечат своите единици од Донбас е централна точка на спор во тековните разговори.
Извори вклучени во преговарачкиот процес укажуваат дека американската страна не гледа простор за компромис по ова прашање, што отвора можност САД целосно да се повлечат од понатамошен дипломатски ангажман.
„Американците не гледаат простор за договор по клучно прашање, што би можело да доведе до нивно излегување од процесот“, според изјавата на еден од членовите на тимот на претседателот Володимир Зеленски, запознаен со текот на последната рунда преговори.
Во такви околности, во Киев расте загриженоста дека прекинот на американската помош би можел да стане реално сценарио, што значително би ја ослабело позицијата на Украина во тековниот конфликт.
Сепак, украинското раководство, како што е наведено, проценува дека повлекувањето на трупите од Донбас би имало долгорочни неповолни стратешки последици.
Според извори во преговарачката група, украинската страна се обидува да понуди алтернативни решенија, вклучувајќи модели на економски зони или други форми на компромис, но разговорите се враќаат одново и одново на почетната состојба, повлекување на силите.
Паралелно со надворешните политички притисоци, Украина се соочува и со внатрешни политички предизвици.
Во Врховната рада, како што наведуваат истите извори, се случи губење на стабилното мнозинство на владејачката фракција, што го отежнува донесувањето закони од суштинско значење за функционирањето на државата.
Еден од истакнатите претставници на владејачката партија „Слуга на народот“ процени дека трилатералните преговори најверојатно ќе бидат привремено прекинати, бидејќи ниту една страна не е подготвена да направи отстапки.
Во овој контекст, сè почесто се разгледуваат сценарија што вклучуваат продолжување на мандатот на сегашното свикување на парламентот за период од уште една до три години, со цел да се зачува институционалната стабилност во услови на продолжена криза.