Воен транспортен авион со 128 лица, претежно војници, се урна кратко по полетувањето во Пуерто Легуизамо, Колумбија, во понеделник, при што загинаа најмалку 66 лица, а десетици беа повредени, изјави началникот на вооружените сили на Колумбија.
Авионот „Локид Мартин Ц-130 Херкулес“ се урна кратко по полетувањето од Пуерто Легуизам, во близина на јужната граница со Еквадор и Перу, расфрлајќи запалени остатоци по дното на џунглата, објави Ал Џезира.
Генералот Хуго Алехандро Лопез Барето изјави дека четворица воени лица сè уште се водат како исчезнати.
„За жал, како резултат на оваа трагична несреќа, 66 од нашите воени лица загинаа“, рече тој.
„Засега, немаме информации или индикации дека станува збор за напад од нелегална вооружена група“, додаде Барето.
Министерот за одбрана Педро Санчез објави на X дека авионот превезувал војници кога се случила „трагичната несреќа“ во Пуерто Легуизамо, во амазонската покраина Путумајо, која граничи со Перу и Еквадор.
Сликите споделени на интернет од колумбиските медиуми покажаа црн облак од чад што се издига од полето каде што се урна авионот и камион што превезува војници како брза кон местото на несреќата.
Најмалку 48 лица беа спасени живи од остатоците од воениот транспортен авион.
Колумбија го набави својот прв авион „Локид Мартин Ц-130 Херкулес“ кон крајот на 1960-тите, а неодамна ги надгради некои од своите постари Ц-130 со понови модели испратени од САД.
Минатиот месец, друг Ц-130 што му припаѓаше на боливиските воздухопловни сили се урна во градот Ел Алто, за малку промашувајќи станбена зграда.
Повеќе од 20 лица загинаа во таа несреќа, а 30 беа повредени.