Претседателот на Соединетите Американски Држави, Доналд Трамп, се обрати на јавноста од Овалната соба, одговарајќи на прашањата на новинарите за теми од надворешната политика, со посебен акцент на Иран.
Трамп истакна дека неговата администрација верува дека нејзините постапки спречиле нуклеарен конфликт што би можел „да еволуира во Трета светска војна“.
„Не сакам војна. Луѓето кои веруваат дека на Иран му е дозволено да има нуклеарно оружје се глупави луѓе. Тие би го користеле и би го дигнале во воздух целиот Блиски Исток, а не само Израел. Тоа можеше да се види кога одеднаш почнаа да испраќаат ракети во радиус од илјада милји“, изјави тој.
Американскиот претседател објасни дека неговата одлука да дејствува против нуклеарната програма на Иран е клучна за глобалната безбедност и дека операцијата „Епски бес“ спречила нуклеарен напад што можел да се претвори во Трета светска војна.
„Нема да остане ништо. Ние ја завршивме нашата работа за светот. Ако му дадете на Иран нуклеарно оружје, барем многу значаен дел од светот би бил дигнат во воздух, речиси веднаш“, рече Трамп, според Скај њуз.
Тој, исто така, изрази загриженост поради недостатокот на јасно иранско лидерство и тешкотиите во преговорите.
„Тие немаат оружје, немаат лидерство. Мојот најголем проблем е што не знам со кого треба да разговарам“, рече тој, нагласувајќи дека е „многу горд“ на резултатите од неговата администрација.