Единствениот победник од војната на Блискиот Исток досега е Русија, бидејќи конфликтот ги зголемува цените на енергијата и го одвлекува вниманието од нејзината агресија врз Украина, изјави во вторник претседателот на Европскиот совет, Антонио Коста, пишува Ројтерс.
„Досега има само еден победник во оваа војна – Русија“, рече Коста во говорот пред амбасадорите на ЕУ во Брисел.
Пренасочување на ресурсите и вниманието
„Русија добива нови средства за финансирање на својата војна против Украина бидејќи цените на енергијата растат. Таа, исто така, има корист од пренасочувањето на воените капацитети што инаку би можеле да бидат испратени за да ѝ помогнат на Украина. Конечно, таа има корист од намаленото внимание кон украинското бојно поле, додека конфликтот на Блискиот Исток е во центарот на вниманието.“
Повик за деескалација и преговори
Коста нагласи дека Европската Унија мора да го заштити меѓународниот поредок базиран на правила, кој, според него, сега го оспоруваат САД.
Тој ги повика сите страни на Блискиот Исток да се вратат на преговарачката маса.
„Слободата и човековите права не можат да се постигнат со бомби. Само меѓународното право ги поддржува“, рече тој.
„Мора да избегнеме понатамошна ескалација. Ваквите случувања го загрозуваат Блискиот Исток, Европа и пошироко.“