Израелската армија објави дека започнала нов бран воздушни напади врз инфраструктурата на Хезболах во либанскиот главен град Бејрут.
Израелските одбранбени сили (ИДФ) соопштија дека дополнителни детали за нападите ќе бидат објавени подоцна.
Пред нападот, армијата издаде предупредување за евакуација на две згради во либанската престолнина.
„Од понеделник беа погодени повеќе од 250 цели на Хезболах во Либан“
Според израелската војска, од понеделникот, кога Хезболах се приклучи на конфликтот, израелските сили погодиле повеќе од 250 цели во Либан, од кои околу 100 во последните 24 часа.
Меѓу погодените цели, според ИД, се високи оперативци на милитантни групи, ракетни фрлачи, магацини за оружје и командни центри на Хезболах и други вооружени групи.
Во текот на ноќта израелската армија наведува дека го погодила командниот центар на Хезболах во областа Набатие, како и други објекти на таа група на југот на Либан.
ИДФ тврди и дека во текот на ноќта бил уништен ракетен фрлач на Хезболах кој истрелал три ракети кон Тел Авив и Хаифа.
Според Израел, фрлачот бил уништен во рок од еден час по нападот.
Во јужен Либан, израелската војска проценува дека околу 300.000 цивили ги напуштиле своите села откако ИДФ издала наредби за евакуација.
Во текот на ноќта армијата издаде нови предупредувања за евакуација на повеќе од десет села во јужен Либан.