Шефот на ОН за човекови права, Волкер Турк, денес повика на итен политички дијалог за прекин на борбите меѓу Авганистан и Пакистан, изразувајќи загриженост поради наглото зголемување на бројот на цивилни жртви.
„Оваа ситуација бара итен политички дијалог, наместо ескалација на употребата на сила“, рече Турк во изјава дадена за време на сесијата за Авганистан во Советот за човекови права на ОН во Женева.
Пакистан изврши воздушни и копнени напади во текот на ноќта врз цели на талибанската влада во Кабул, Кандахар и Пактија, по она што Исламабад го нарече претходни „неиспровоцирани напади“ од страна на авганистанските сили врз пакистанските воени објекти по должината на границата.
Пакистански безбедносни извори изјавија дека целите биле позиции на талибанските сили, штабови и складишта за муниција во повеќе сектори по должината на границата долга 2.600 километри.
Портпаролот на талибаните, Забихулах Муџахид, потврди дека се извршени воздушни напади во делови од Кабул, Кандахар и Пактија.
Министерот за одбрана на Пакистан, Хаваџа Мохамад Асиф, денес изјави дека неговата земја „изгубила трпение“ и сега верува дека е во „отворена војна“ со Авганистан, пренесува Танјуг.