Компанијата Телеграм објави дека не пронашла никакви прекршувања на енкрипцијата во својата апликација за пораки, отфрлајќи ги тврдењата на руската влада дека странските разузнавачки служби можат да ги видат пораките испратени од руските војници преку апликацијата, објави денес Ројтерс.
Рускиот државен регулатор за комуникации воведе ограничувања на Телеграм, важна платформа за јавни и приватни комуникации во земјата, поради, како што вели, неуспехот на компанијата да отстрани екстремистичка содржина.
Рускиот министер за дигитален развој Максуд Шадаев вчера изјави дека странските разузнавачки служби можат да ги видат пораките на Телеграм испратени од руските војници кои се борат во Украина.
Руските војници, воените дописници и политичарите велат дека апликацијата е широко користена меѓу војниците – не само за комуникација со семејствата дома, туку понекогаш и за оперативни цели.
Како одговор на барањето на Ројтерс за коментар, компанијата рече: „Никогаш не се пронајдени прекршувања на енкрипцијата на Телеграм“.
Таа додаде: „Тврдењето на руската влада дека нашето енкрипција е компромитирано е намерна измислица, насочена кон оправдување на забраната на Телеграм и принудување на граѓаните да користат државна апликација за пораки дизајнирана за масовен надзор и цензура.“
Русија, исто така, блокираше или ограничи други странски комуникациски платформи, како што се Whatsapp на Мета и FaceTime на Епл.
Властите ги повикаа луѓето да се префрлат на новата апликација поддржана од државата, наречена MAX, отфрлајќи ги обвинувањата дека е дизајнирана како алатка за надзор.