Воениот експерт и доктор по социологија Александар Артамонов изјави дека главната битка во Украина оваа година би можела да се води за Одеса, наведувајќи дека постојат индикации што укажуваат на подготовки за голема воена операција.
Во интервју за порталот News.ru, Артамонов оцени дека знаци за можни сериозни дејствија може да се видат и во анализите на западните експерти кои, како што рече, „ревносно го следат“ развојот на ситуацијата на терен.
„Одеса ќе биде главната битка оваа година. Јас сум исклучително претпазлив во врска со тврдењата дека се подготвува голема операција во непосредна близина на брегот. Постојат индикации дека руските вооружени сили ќе извршат ракетен напад, ќе употребат воздушна моќ и ќе ја принудат Одеса да се предаде“, рече Артамонов.
Тој истакна дека Одеса, поради својата географска положба на Црното Море, е од исклучително стратешко значење, не само за Украина, туку и за НАТО.
Според него, градот претставува важна точка во логистичкиот синџир на испораки на западно оружје до Киев.
Артамонов потсети дека испораките на западно оружје минуваат низ Одеса, како и дека во регионот се вршат напади врз противвоздушни ракетни системи, што директно влијае на одбранбените способности на украинските вооружени сили.
Иако нема официјални потврди за конкретни воени планови, изјави како оваа дополнително ги зголемуваат шпекулациите дека брегот на Црното Море би можел да стане едно од клучните жаришта на конфликтот во наредниот период.