Првиот состанок на трилатералната работна група за безбедносни прашања ќе се одржи денес во Обединетите Арапски Емирати (ОАЕ), изјави доцна синоќа советникот на Кремљ Јуриј Ушаков, додавајќи дека неодамнешната средба меѓу рускиот претседател Владимир Путин и американскиот претставник Стив Виткоф била „корисна во секој поглед“.
Ушаков им изјави на новинарите дека руска делегација, предводена од висок функционер на Генералштабот, генерал Игор Костјуков, патува во Абу Даби за да се сретне со Украинците и Американците.
„Американците направија многу за да се подготват за овој состанок и се надеваат дека ќе биде успешен и дека ќе отвори перспективи за напредок по сите прашања поврзани со завршувањето на конфликтот“, нагласи Ушаков, објави францускиот весник „Монд“.
Средба посветена на економските прашања ќе се одржи денес во Абу Даби помеѓу Виткоф и претставникот на Кремљ за меѓународни економски прашања, Кирил Дмитриев, изјави Ушаков.
„Искрено сме заинтересирани за решение (на конфликтот) преку политички и дипломатски средства. Додека тоа не се случи, Русија ќе продолжи да ги постигнува своите цели на бојното поле“, додаде тој.
Според Киев, Украина на трилатералниот состанок ќе ја претставуваат секретарот на Советот за безбедност Рустем Умеров, неговиот началник на кабинетот Кирил Буданов, заменик-началникот на кабинетот Сергеј Кислица, шефот на претседателската партија Давид Арахамија и началникот на Генералштабот на вооружените сили, генерал Андриј Хнатов.