Руските сили извршија напади со беспилотни летала и ракети врз два града во југоисточна Украина во четврток, при што загина едно лице, а повеќе од 20 беа повредени, соопштија локалните власти во петок.
Гувернерот на Запорошката област во објава на Телеграм изјави дека руските сили извршиле четири напади врз градот Комишуваха, при што загина едно лице, а десет други беа повредени.
Во нападот беа оштетени неколку семејни куќи.
Во индустрискиот град Кривји Рог, родното место на претседателот Володимир Зеленски во Дњепропетровската област, 13 лица, меѓу кои и четири деца, беа повредени во комбинирани руски напади со беспилотни летала и ракети, изјави Олександр Вилкул, началник на воената администрација на тој град, во објава на Телеграм.
Стамбени згради, училишта и стратешка инфраструктура беа погодени во нападите.
„Главната работа е што сите преживеаа“, напиша Вилкул, додавајќи дека шест лица, меѓу кои и повредени деца, се хоспитализирани.
Ројтерс не можеше независно да потврди дека нападите се случиле, а руските претставници не ја коментираа ситуацијата.