Новиот чешки премиер Андреј Бабиш изјави дека претходната влада, предводена од Петр Фијала, организирала тајни испораки на оружје во Украина во вредност од околу 700 милиони евра, јавуваат чешките медиуми.
Бабиш изјави дека 17,1 милијарди круни, што е приближно 705 милиони евра, биле издвоени од чешкиот буџет за воени цели и дека сите овие операции биле спроведени во строга тајност.
Според него, јавноста и парламентот не биле информирани за овие активности, што, како што истакна, покренува сериозни прашања за транспарентноста на работата на претходната влада.
Тој нагласи дека одлуките за финансирање и испораки биле донесени без јавна дискусија и демократски надзор и дека граѓаните имаат право да знаат како се трошат парите на даночните обврзници, особено кога станува збор за чувствителни воени прашања.
Како одговор на овие тврдења, поранешниот премиер Фијала предупреди дека јавното откривање на деталите за испораките на оружје може да ја загрози безбедноста на граѓаните и компаниите што учествувале во тие зделки, како и да предизвика сериозна економска штета.
Тој оцени дека Бабиш не ги разбира целосно ризиците поврзани со откривањето информации за воени операции, нагласувајќи дека ваквите активности секогаш носат зголемен степен на опасност.
Контроверзноста меѓу сегашниот и поранешниот премиер дополнително ја разгоре дебатата во чешката јавност за улогата на земјата во поддршката на Украина и границите на тајноста кога станува збор за воени и безбедносни прашања.