Илјадници туристи останаа заглавени во северна Финска откако летовите од аеродромот Китила беа откажани поради екстремно ниски температури, додека наставата во некои делови од Германија беше откажана или се одржуваше онлајн поради студот и обилните снежни врнежи.
Температурата на аеродромот Китила падна на минус 37 степени Целзиусови по неколкудневните арктички временски услови, што го отежна одмрзнувањето на авионите и другите аеродромски операции, објави Скај њуз.
Китила се наоѓа во финска Лапонија, во ретко населениот северен дел од земјата.
Иако се навикнати на сурови зимски услови, жителите на Финска особено го чувствуваат студениот бран оваа година, кој е посилен од претходните години и зафати широки области од северна, централна и источна Европа.
Финската јавна служба Иле наведува дека се очекува температурата сепак да се зголеми во наредните денови.
Обилните снежни врнежи, силните ветрови и ледените услови го направија патувањето опасно низ целиот континент.
Во Германија, патниците на железничкиот сообраќај се соочија со долги доцнења и откажувања во неделата откако обилните снежни врнежи го натераа националниот железнички оператор да ги суспендира сите железнички услуги на северот од земјата.
Властите соопштија дека поради ниските температури, сите училишта во сојузната покраина Северна Рајна-Вестфалија, најнаселениот регион во западна Германија, ќе останат затворени денес и ќе се префрлат на онлајн настава.