Американскиот претседател Доналд Трамп синоќа им рече на новинарите во Белата куќа дека САД ќе интервенираат во Иран ако властите таму почнат да убиваат луѓе, велејќи дека земјата е „во големи проблеми“, но исклучи испраќање војници, пренесува Би-Би-Си.
„Ќе ги удриме многу силно таму каде што најмногу боли“, предупреди Трамп, додавајќи дека неговата администрација внимателно ја следи ситуацијата во Иран, но дека мешањето на САД не значи „чизми на терен“.
Трамп рече: „Иран е во големи проблеми. Ми се чини дека народот презема одредени градови за кои никој не веруваше дека се можни само пред неколку недели“.
Трамп издаде слично предупредување вчера, кога вети дека ќе „удри многу силно“ врз Иран ако таа земја „почне да убива луѓе“.
Владата на таа исламска држава ја држи земјата во информативна изолација цел ден, прекинувајќи ги интернет и телефонските врски со светот.
Иранците испраќаат ретки видео сведоштва од теренот преку Starlink, кој е забранет во таа земја.