Британскиот крал Чарлс изјави дека Велика Британија и Германија се подготвени „да ја поддржат Европа во лицето на заканата од натамошна руска агресија“.
Говорејќи на државниот банкет во чест на германскиот претседател Франк-Валтер Штајнмаер, кралот го пофали договорот за заедничка одбрана меѓу двете земји, нарекувајќи го „уникатно партнерство во срцето на НАТО“, пишува Sky news.
На почетокот на тридневната државна посета, Штајнмаер рече дека двете земји „работат заедно за унапредување на безбедноста и одбраната, рамо до рамо за слободна, мирна Европа… со поддршка на Украина“.
Ова е прва државна посета на германскиот лидер на Велика Британија по 27 години, а околу 160 гости присуствуваа на банкетот во салата Свети Џорџ во Виндзор, опкружен со новогодишна елка украсена со 3.000 светилки.
Во текот на вечерта, кралот се пошегувал на нивната заедничка љубов кон фудбалот, изјавувајќи дека „на крајот Германците победуваат“.
Штајнмаер и неговата сопруга Елке Буденбендер беа пречекани од кралот Чарлс и кралицата Камила во Виндзор.
Германскиот претседател се сретна и со британскиот премиер Кир Стармер на тркалезна маса на бизнис лидери од двете земји, како дел од проектот за електрични возила од повеќе од 20 милиони евра, предводен од Mercedes, кој ќе отвори 150 работни места во Нортхемптоншир и Оксфордшир.
Во јули, Германија и Велика Британија го потпишаа Кенсингтонскиот договор, а Стармер рече дека земјите „ќе соработуваат уште поблиску“.
Тој рече дека односите меѓу двете земји се во „многу, многу силна позиција“ и дека партнерството е клучно за прашања како Украина, миграцијата, економскиот раст и трговијата.
Штајнмаер денеска ќе положи цвеќе на гробот на кралицата Елизабета Втора во капелата Свети Џорџ во Виндзор, а подоцна ќе се обрати во парламентот.
Штајнмаер вчера пристигна во официјална посета на Велика Британија.
На почетокот на тридневната посета на германскиот претседател, британската кралска двојка организираше свечен воен пречек на гостите од Германија, по што следеше почесен вод од 41 артилерија и возење со кралска кочија низ улиците на градот Виндзор до урнатините на катедралата во Ковентри, која беше бомбардирана за време на Втората светска војна, пишува лондонскиот Guardian.