Во уметничката галерија на НУ Музеј – Куманово вчеравечер беше отворено 19-то издание на најстарата меѓународна изложба на уметничка фотографија во Македонија – „Фото салон Куманово 2025“.
Настанот традиционално го организира Фото кино клуб „Козјак“, член на Фото сојузот на Македонија, со поддршка од Општина Куманово и Министерството за култура и туризам.
Изложбата ја отвори претседателот на клубот, Милош Нешковски, кој истакна задоволство од големиот интерес и бројноста на пријавени уметнички фотографии, што уште еднаш го потврдува значењето на „Фото салон Куманово“ како препознатлива фотографска манифестација.
На годинашното издание учествуваа 127 автори од 12 земји, претставувајќи дела на слободна тема.
Жирито во состав: Радисав Филиповиќ (Србија), Михаел Кацафура (Словенија), Борис Божиќ (Австрија), Неда Рачки (Хрватска) и Боро Рудиќ (Македонија), додели вкупно 18 награди – девет медали и девет дипломи.
За најдобар автор на изложбата беше прогласен Олег Маловитски од Украина.
Настанот го проследија претставници од општинската администрација и членови на Советот на Општина Куманово, кои дадоа поддршка на оваа значајна културна манифестација.
Никола Ивановски