Шефот на Воената администрација на Одесската област (ОВА), Олег Кипер, побара забрана за руска музика во клубови и други јавни простори, откако видео од диџеј кој емитува песна од руски изведувач пред публика од над 1.000 луѓе во клубот „Паладиум“ во Одеса беше објавено на интернет во саботата навечер.
„Одеса е град кој страда од руски напади речиси секој ден. И во овој момент, во ноќниот клуб се пуштаат песни од руски изведувачи. И ова е во четвртата година од тоталната војна“, рече Кипер, пренесува РБК Украина.
Според него, „забавата со музиката на агресорите“ за време на војната со Русија е непочитување на бранителите, вклучително и оние кои ги дадоа своите животи за Украина.
Тој им наложи на надлежните оддели на ОВА да ја разберат ситуацијата и да дадат правна проценка на постапките на раководството на ноќниот клуб.
„Организаторите мора да објаснат како ова е воопшто можно во град кој е официјално признат како борбена зона“, рече началникот на воената администрација на Одеса.
Украинските медиуми објавија дека полицијата пристигнала во клубот „Паладиум“ за да ги утврди деталите за инцидентот.
Според украинскиот портал РБК, во Украина повремено има „скандали поради рускиот јазик“, кој се користи на концерти, на јавни места, па дури и во просториите за услуги кога клиентите не сакаат да го зборуваат официјалниот јазик, а во овие скандали често се вклучени луѓе од шоу-бизнисот, познати ѕвезди и актери.
Во октомври, пејачот Иван Дорн ја запрепасти публиката објавувајќи дека „дојде време“ да го издаде својот албум на руски јазик.
Според него, тој интуитивно чувствува дека во моментов има побарувачка за руски песни во општеството.
Музичарот Андреј Данилка, кој настапува под името Верка Серџочка, одржа концерт во Киев на руски јазик, што го натера јазичниот омбудсман да реагира.