Членовите на американскиот конгресен комитет што го истражува случајот на Џефри Епштајн ги интензивираа своите повици братот на британскиот крал Чарлс, Ендру, да одговори на прашања за неговите врски со покојниот финансиер и осуден сексуален престапник, објави денес Би-Би-Си.
Кралот Чарлс му ја одзеде на Ендру кнежевската титула пред два дена и го избрка од неговата вила во дворот на замокот Виндзор, по растечкиот јавен протест против кралското семејство поради компромитирачки медиумски наслови за неговото однесување.
По преселбата на британскиот крал и одземањето на титулата принц, Ендру Маунтбатен Виндзор беше поканет да сведочи во Соединетите Американски Држави од најмалку четири демократски членови на Надзорниот комитет на Претставничкиот дом, кој го истражува постапувањето на американската влада во случајот Епштајн.
Демократскиот конгресмен на САД, Раџ Кришнамурти, го повика Ендру да „дојде пред Конгресот на САД“ и доброволно да сведочи, без да чека судска покана.
„Дојдете и сведочете и кажете ни што знаете. Не само за да им се даде правда на преживеаните, туку и за да се спречи ова никогаш повторно да се случи“, рече тој.
Друг демократски конгресмен, Сухас Субраманјам, рече дека Ендру може да сведочи од далечина, со својот адвокат.
Британскиот министер за трговија Крис Брајант изјави за Би-Би-Си во петокот дека Ендру треба да оди во САД за да одговори на прашања за Епштајн.