Ураганот „Мелиса“ ги пустоши карипските земји. Тој стигна до јужниот брег на источна Куба како ураган од трета категорија, соопшти американскиот национален центар за урагани.
Повеќе од 735.000 луѓе се евакуирани, изјави кубанскиот претседател Мигел Дијаз-Канел. Тој посочи дека невремето ќе донесе „многу тешка ноќ“.
Мелиса се наоѓаше на околу 95 километри западно-југозападно од Гвантанамо, Куба, со максимални удари на ветер од 195 километри на час, пренесе АП.
Повеќе од 735.000 луѓе се евакуирани, изјави кубанскиот претседател Мигел Дијаз-Канел.
Тој посочи дека невремето ќе донесе „многу тешка ноќ“, но изрази уверување дека земјата ќе може да се опорави.
Источна Куба очекува обилни врнежи од дожд, до 60 сантиметри во планинските области, што може да предизвика поројни поплави и лизгање на земјиштето.
Со ветрови од 190 километри на час, бура до 3,6 метри на брегот и посилни налети на ветер во центарот на невремето, населението е предупредено на „опасност по животот“.
Пред Куба, ураганот ја погоди Јамајка, каде што околу 15.000 луѓе беа сместени во засолништа за итни случаи, а премиерот Ендрју Холнес ја прогласи земјата за „област на катастрофа“.
Пријавени се штети во болници, станбени и деловни објекти, а повеќе од половина милион луѓе останаа без струја.
Интернет-конективноста падна на 30 отсто од нормалното ниво, а на островот останаа околу 25.000 туристи.
Холнес рече дека струјата и телекомуникациите треба да бидат обновени денеска во источниот дел на островот, додека јужниот дел очекува дополнителни денови за закрепнување.
Американскиот претседател Доналд Трамп, кој е на последната фаза од својата азиска турнеја, изјави дека САД се подготвени да ѝ помогнат на Јамајка.
„Внимателно ја следиме ситуацијата и подготвени сме да преземеме акција, но тоа предизвикува огромна штета“, рече Трамп од претседателскиот авион.
Подоцна денеска Мелиса се прогнозира да ги погоди југоисточните или централните Бахами и да донесе услови за тропска бура на Хаити, а до четврток ќе се приближи до Бермудите.
Ураганот Мелиса се рангира меѓу најмоќните бури некогаш регистрирани во басенот на Атлантикот, заедно со ураганот Доријан во 2019 година.
„Мелиса“ е исто така најмоќната бура што некогаш ја погоди Јамајка, надминувајќи го ураганот Гилберт во 1988 година, кој потоа го погоди островот како ураган од четврта категорија со ветрови од 209 километри на час.