Најмалку 40 лица беа убиени, а повеќе од 80 беа ранети откако моторизиран параглајдер фрли две бомби врз толпа за време на будистички фестивал во Мјанмар, потврдија локални извори и сведоци.
Меѓу загинатите имало неколку деца, јавува Скај њуз.
Нападот се случил во понеделник вечерта во општината Чаунг У во централниот дел од земјата, каде што стотици луѓе се собрале за да ја одбележат полната месечина Тадинѓут, еден од најважните будистички празници во Мјанмар.
Според организаторите на фестивалот, нападот траел само седум минути, а бомбите паднале директно врз толпата.
Телата на многу жртви сè уште не се идентификувани, а локалните власти и волонтерите сè уште собираат делови од тела од местото на нападот.
Брутален напад врз цивили
Сведоците наведуваат дека во времето на експлозиите, парчиња метал и остатоци летале во воздухот, и дека голем број луѓе биле убиени од шрапнели.
Нападот се случил додека многумина палеле традиционални ламби и го славеле празникот, додека некои истовремено протестирале против воената хунта која ја презела власта со воен удар во 2021 година.
Регионот Сагаинг, каде што се случил нападот, е едно од главните боишта во војната меѓу армијата и Народните одбранбени сили (ПДС) – доброволни милиции формирани за да се спротивстават на воената власт.
Големи делови од регионот се под контрола на овие милиции, а судирите со армијата се секојдневни.
Локален службеник на ПДС изјави за Би-Би-Си дека имале дојава за можен воздушен напад и се обиделе да ја предупредат толпата, но параглајдерот пристигнал порано од очекуваното.
Амнести: „Застрашувачки потсетник на заборавена војна“
Амнести Интернешнл остро го осуди нападот, предупредувајќи дека употребата на моторизирани параглајдери за напад врз цивили е „морнален и вознемирувачки тренд“.
Поради меѓународните санкции, војската на Мјанмар сè повеќе се потпира на парамотори бидејќи нема авиони и хеликоптери.
„Нападот треба да послужи како застрашувачко предупредување дека цивилите во Мјанмар имаат потреба од итна заштита“, рече Џо Фримен, истражувач на Амнести интернешнл за Мјанмар.
Тој додаде дека „меѓународната заедница можеби заборавила на конфликтот, но армијата го користи тој заборав за да изврши воени злосторства неказнето“.
Конфликтите не престануваат, изборите се приближуваат
Од воениот удар во 2021 година, илјадници луѓе загинаа, а милиони се раселени.
Судирите меѓу армијата, вооружените групи на отпор и етничките милиции продолжуваат да беснеат низ целата земја.
Во декември, Мјанмар треба да ги одржи своите први општи избори по пучот, но меѓународните набљудувачи предупредуваат дека изборите нема да бидат ниту слободни ниту фер и дека хунтата ќе го искористи гласањето за да ја консолидира власта.