Четиринасет кутии бупренорфин, лек кој се користи за третман на зависност од опоиди, биле откриени на патниот правец Куманово – Свети Николе.
Како што информираат од Секторот за внатрешни работи, приведени се две лица, а кај едно од нив, затвореник, пуштен на отсуство, биле пронајдени таблетите.
– На 02.10.2025 во с.Скачковце, кумановско, полициски службеници ги лишија од слобода Ј.С.(45) и М.М.(29), двајцата од Свети Николе. При контрола на патничко возило „пежо“ со светиниколски регистарски ознаки, кое го управувал Ј.С., а сопатник бил М.М., кај М.М. се пронајдени и одземени 14 кутии или 392 таблети бупренорфин, информираат од Секторот за внатрешни работи.
Како што додаваат од полицијата, при преземање мерки утврдено е дека М.М. издржувал затворска казна во Казнено – поправната установа Затвор Штип и дента бил пуштен на седумчасовно отсуство.
– По целосно документирање на случајот, ќе биде поднесена соодветна пријава, стои во соопштението.
Никола Ивановски