Проевропската Партија за акција и солидарност (ПАС) на претседателката Маја Санду победи на парламентарните избори во Молдавија со повеќе од 50 проценти од гласовите, според официјалните резултати објавени во понеделник по пребројувањето на 99,52 проценти од гласачките ливчиња.
Партијата за акција и солидарност (ПАС), која е на власт од 2021 година, освои 50,03 проценти од гласовите, а прорускиот Патриотски блок 24,26 проценти, според резултатите објавени од Централната изборна комисија на нејзината веб-страница.
Останатите необработени гласови сугерираат дека ПАС би можела да го обезбеди клучното мнозинство што ѝ е потребно во 101-члениот дом за да избегне потенцијално нестабилна коалиција и да го одржи статусот на кандидат за ЕУ на Молдавија на вистинскиот пат.
Молдавија, земја со околу 2,4 милиони жители, е кандидат за ЕУ од 2022 година.
Според проекциите, ПАС би можела да задржи апсолутно мнозинство со 55 од вкупно 101 место.
Во изминатото свикување на собранието, таа имаше 63 претставници.
Проевропскиот Алтернативен Блок (8 проценти од гласовите) и популистичката Наша партија (6,2 проценти од гласовите) исто така треба да влезат во парламентот.
Официјалните конечни резултати се очекуваат подоцна во понеделник.
Кампањата за изборите, која лидерите на ПАС ја нарекоа најзначајна од независноста на Молдавија, беше нарушена од обвинувања за злоупотреби од двете страни пред и на денот на изборите.
Владата на претседателката Маја Санду ги предупреди Молдавците дека Русија се обидела да влијае на изборите со широко распространети дезинформации и купување гласови.
Станислав Секриеру, советникот за национална безбедност на претседателот, рече дека изборната инфраструктура и владините веб-страници биле цел на сајбер напад и дека гласачките места во Молдавија и во странство добиле извештаи за лажни закани со бомби.
Москва негира дека се мешала во изборите.
Во неделата, Игор Додон, еден од лидерите на Патриотскиот блок и поранешен молдавски претседател, повика на протести во понеделник пред парламентот, тврдејќи дека Санду планира да ги откаже изборите. Тој не даде докази за тие тврдења.
Да потсетиме дека Москва го обвини и раководството во главниот град Кишињев за манипулација, тврдејќи дека руските партии и сили биле исклучени од изборите.