Данскиот министер за одбрана Троелс Лунд Поулсен изјави дека земјата ја разгледува можноста за активирање на Член 4 од НАТО поради вториот упад на неидентификувани беспилотни летала над аеродромите за една недела, но дека сè уште не е донесена конечна одлука.
Доколку тоа се случи, тоа би бил прв пат во историјата на Данска, јавува данската телевизија ТВ2.
„Данска веќе го контактираше НАТО утрово“, рече Поулсен.
Тој додаде дека, покрај Член 4, можат да се користат и други мерки во рамките на Алијансата.
„Сосема е јасно дека нешто мора да се преземе во рамките на НАТО“, рече тој.
Што е Член 4?
Според Член 4, секоја земја-членка може да свика состанок на Северноатлантскиот совет ако смета дека нејзиниот територијален интегритет, политичка независност или безбедност се загрозени.
На таков состанок се дискутира дали постои закана и како може заеднички да се одговори на неа.
Член 4 е активиран седум пати во историјата на НАТО.