Шума и сува трева горат на непристапен терен во атарот на селото М’гленце, Општина Старо Нагоричане, на границата со Србија.
Како што информираат од Регионалниот центар за управување со кризи, пожарот избувнал вчера попладне, по што шестмина пожарникари со две возила околу 17:25 часот се упатиле на терен.
Според последните информации на РЦУК од утринава, пожарот е се уште активен, а гори на самата гранична линија со Србија, односно два до три километри на македонска територија.
– Пожарот во с М’гленце е се уште активен. Моменталлно на терен се 9 пожарникари со 2 возила и 2 вработени од општина Старо Нагоричане, информираат од РЦУК.
Вчера пак, кумановските пожарникари интервенирале на запалена сува трева во два наврати во атарот на липковско Матејче.
Во липковско Отља пак гореле сува трева и ниска шума. Таму интервенирале тројца вработени во ЈП „Македонски шуми“. Интервенцијата започнала околу 18 часот, а веќе во 19:20 огнот бил изгаснат.
Сува трева горела и во атарите на селата Романовце и Черкезе.
Утринава автомобил изгорел на улицата „Моша Пијаде“. Четворица пожарникари интервенирале во период од 05:02 до 05:25 часот.
Никола Ивановски