Израелската војска објави дека денес пресретнала ракета истрелана од Јемен, три дена откако Ерусалим ги бомбардираше базите на бунтовниците Хути во главниот град на Јемен, Сана.
„Откако се огласија сирени во неколку области на Израел, израелските воздухопловни сили пресретнаа ракета лансирана од Јемен“, соопшти војската на Телеграм, а очевидци рекоа дека се слушнале сирени за воздушен напад во Ерусалим.
Хутите во Јемен тврдат дека нападите врз Израел се знак на солидарност со Палестинците во Појасот Газа, додека Ерусалим ги пресретнува повеќето од нивните беспилотни летала.
Израелската војска соопшти дека во неделата бомбардирала воени објекти на Хутите, вклучувајќи ја претседателската палата и складиштето за гориво во Сана.
Хутите изјавија дека нападите биле насочени кон станица на нафтена компанија и електрана, и дека убиле 10 и раниле 96 лица.
Хутите контролираат големи делови од Јемен од 2014 година и се дел од сојуз против Израел основан од Иран, кој вклучува и групи како што се либанскиот Хезболах и палестинскиот Хамас.