Британскиот премиер Кир Стармер се соочува со растечки притисок поради „кризата со малите чамци“ откако протестите продолжија пред хотел за азиланти, а анкетата покажува дека јавноста мисли дека тој не успева да се справи со проблемот.
Премиерот и неговата влада утврдија мерки за забрзување на системот за жалби за азил за да помогнат во отстранувањето на луѓето без право на престој во Велика Британија.
Но, поранешниот министер за внатрешни работи, Дејвид Бланкет од Лабуристичката партија, рече дека владата досега не понудила „сеопфатен одговор или сеопфатна приказна“ за тоа како да се справи со кризата.
Речиси 30 илјади мигранти го преминале Ламанш во 2025 година
Оваа година, рекордни 28.076 луѓе го преминале Ламанш во мали чамци, што е за 46 проценти повеќе отколку во истиот период во 2024 година.
Протестите на местата каде што се сместени барателите на азил продолжија во текот на викендот, а владата се подготвува за понатамошни правни битки околу користењето на хотелот.
Бланкет, кој предложи привремено суспендирање на елементи од Европската конвенција за човекови права и Конвенцијата на ОН за бегалци за справување со проблемот, рече дека Стармер мора да биде „радикален“ во својот пристап.
Анкетата на YouGov за весникот „Тајмс“ покажа дека 71 процент од гласачите веруваат дека премиерот лошо се справува со прашањето за хотелите за азил, вклучувајќи 56 проценти од поддржувачите на лабуристите.
Анкетата на 2.153 лица покажа дека 37 проценти од гласачите сметаат дека имиграцијата и азилот се најважниот проблем со кој се соочува земјата.
„Работите почнуваат да се оддалечуваат од влијанието на владата до тој степен што ќе биде многу тешко да се вратат под контрола. Понатамошен пакет акции е апсолутно неопходен за да се започне со контрола на наративот и спроведувањето на политиките“, рече Бланкет.