Сопругата на затворениот поранешен јужнокорејски претседател Јун Сук Јеол, Ким Кеон Хи, е уапсена по низа сериозни обвиненија, вклучувајќи манипулација со акции и поткуп.
Поранешната прва дама ги негираше сите обвиненија за време на четиричасовното судско рочиште во Сеул, но судот сепак издаде наредба за притвор, наведувајќи го ризикот од уништување на доказите, пишува Би-Би-Си.
Случај без преседан
Иако Јужна Кореја има долга историја на обвинувања и затворање на поранешни претседатели, ова е прв пат и поранешен претседател и поранешна прва дама да бидат зад решетки.
Нејзиниот сопруг, Јун, беше приведен во јануари и чека судење за неуспешен обид за воведување воена состојба минатата година, потег што ја втурна земјата во хаос и на крајот доведе до негово соборување.
Мултимилионски заработки и скапи подароци
Обвинителите тврдат дека Ким, 52, заработила повеќе од 800 милиони вони (околу 578.000 долари) со учество во шема за фиксирање на цените за акции во Дојч Моторс, јужнокорејскиот дилер на БМВ.
Иако наводно се случило пред нејзиниот сопруг да стане претседател, аферата фрли сенка врз целиот негов мандат.
Покрај тоа, таа е обвинета дека примила две чанти Шанел и дијамантска огрлица како мито од контроверзната Црква на обединување во замена за деловни услуги.
Меѓу другите обвинувања, Ким наводно влијаела врз номинациите на кандидатите за време на парламентарните дополнителни избори во 2022 година и минатогодишните општи избори.
„Искрено се извинувам“
Ким Кион Хи се појави на сослушувањето во вторник со сериозен израз на лицето, облечена во црно одело.
„Искрено се извинувам што предизвикав проблеми и покрај тоа што сум неважна личност“, кратко им рече таа на новинарите.
Додека беше на функцијата, нејзиниот сопруг Јун стави вето на дури три предлог-закони предложени од опозицијата, кои ќе бараа истрага од специјален обвинител за обвинувањата против неговата сопруга.
Тој го стави своето последно вето во ноември, само една недела пред да прогласи вонредна состојба.
Специјален обвинител за случајот беше формиран во јуни оваа година, откако ривалот на Јун, Ли Џе Мјунг, ја презеде претседателската функција.