Павел Дуров, извршен директор и коосновач на Телеграм, изјави дека сите негови повеќе од 100 деца еден ден ќе добијат дел од неговото богатство од повеќе милијарди долари.
Шефот на платформата за пораки изјави за францускиот весник „Ле Поинт“ дека е „официјален татко“ на шест деца од три врски, но има повеќе од 100 потомци во 12 земји откако ја донирал својата сперма.
– Не правам разлика помеѓу моите деца. Има такви што се зачнати природно и такви што дошле од моите донации на сперма – рече Дуров, објавува „Бизнис Инсајдер“.
– Сите тие се мои деца и сите ќе имаат исти права. Не сакам да се борат едни против други по мојата смрт, вели тој.
Претприемачот роден во Русија има богатство проценето на речиси 14 милијарди долари, според индексот на милијардери на „Блумберг“.
– Го напишав мојот тестамент многу неодамна – изјави Дуров за „Ле Поинт“, додавајќи: „Одлучив моите деца да немаат пристап до моето богатство додека не помине период од 30 години, почнувајќи од денес“.
– Сакам да живеат како обични луѓе, да го изградат својот пат, да научат да веруваат во себе, да можат да создаваат и да не зависат од банкарска сметка.
Дуров објасни дека го напишал тестаментот иако има само 40 години, бидејќи неговата работа носи одредени ризици и бидејќи има непријатели во „моќните држави“.
Тој го основал Телеграм во 2013 година, откако претходно ја лансирал руската социјална мрежа VK.
Денес, Телеграм има околу една милијарда активни корисници ширум светот.
Дуров беше уапсен минатата година откако француските власти го обвинија за соучество во олеснување на криминални активности на Телеграм.
Тој повторно ги негираше сите кривични обвиненија поднесени против него.
Во интервју за Такер Карлсон претходно овој месец, Дуров рече дека сè уште не може слободно да патува, речиси една година по неговото апсење.
Кога го прашале за споредбите со Илон Маск, Дуров за „Ле Поинт“ изјавил дека е многу различен од најбогатиот човек во светот.
„Илон раководи со неколку компании истовремено, додека јас раководам само со една. Илон може да биде многу емотивен, додека јас се обидувам длабоко да размислувам пред да дејствувам – но тоа може да биде и извор на неговата сила“.
Како и Дуров, Маск има неколку деца. Во март, извршната директорка на „Неуралинк“, Сивон Зилис, објави дека има четврто дете со извршниот директор на „Тесла“.
Ентузијаст за фитнес
Коментирајќи го својот младешки изглед, Дуров рече дека неговата рутина за вежбање вклучува 300 склекови по ред, проследени со 300 чучњеви.
– Не пијам алкохол, кафе или чај, не пушам и се држам подалеку од шеќер – додаде Дуров.
Тој исто така ужива во пливање во Финска или Женевското Езеро – во сред зима.