Во понеделник вечерта, електричната енергија полека почна да се враќа во делови од Иберискиот Полуостров по масовниот прекин што ги парализираше Шпанија и Португалија, пишува Ројтерс, пренесува Хина.
Шпанскиот министер за внатрешни работи прогласи вонредна состојба и распореди 30.000 полицајци низ целата земја за да го заштитат јавниот ред и мир.
Владите на двете земји одржаа итни состаноци поради прекинот на електричната енергија, чии размери се без преседан во Европа.
Причината сè уште е непозната, а Португалија наговести дека проблемот потекнува од Шпанија, која, од друга страна, го посочува прстот кон прекинот на меѓусебната врска со Франција.
Португалскиот премиер Луис Монтенегро изјави дека нема индикации дека сајбер напад го предизвикал инцидентот што започнал во 10:30 часот.
Сепак, се појавија гласини за саботажа, а шпанскиот премиер Педро Санчез изјави дека разговарал со генералниот секретар на НАТО, Марк Руте.
Санчез рече дека земјата останала без 15 гигавати електрична енергија, или 60 проценти од националната потрошувачка, за период од само пет секунди.
„Техничарите се обидуваат да утврдат што предизвикало толку ненадеен пад“, рече Санчез. „Ова никогаш порано не се случило.“
„Прерано е да се каже која е причината“
Жоао Консеисао, член на одборот на португалската компанија за електрична енергија РЕН, изјави дека не ја исклучува можноста за „огромна осцилација на електричниот напон, прво во системот на Шпанија, која потоа се прелеала во португалскиот систем“.
„Може да има илјада и една причина, сè уште е прерано да се каже која е причината“, изјави тој.
Шпанската електроенергетска компанија REE смета дека проблемот се појавил во интерконекцијата со Франција.
„Европските системи не можат да се справат со загубата на електрична енергија од такви размери што предизвикаа прекин на врската меѓу шпанската и француската мрежа и последователно предизвикаа колапс на шпанскиот електричен систем“, рече директорот на компанијата Едуардо Прието.