Советниците на американскиот претседател Доналд Трамп го советуваа да не разговара и да не се јавува со рускиот претседател Владимир Путин додека Кремљ не се согласи на прекин на огнот во Украина, објави NBC News, цитирајќи двајца анонимни официјални лица.
На 30 март Трамп изјави дека е „многу лут“ на Путин поради недостигот на напредок во преговорите, но дека планира наскоро да разговара со него.
Двајцата претседатели последен пат разговараа на 18 март, додека во Саудиска Арабија беа во тек мировните преговори за ставање крај на руската војна против Украина.
Иако Трамп на крајот на март рече дека сака наскоро да му се јави на Путин, повикот се уште не е закажан.
Официјални лица велат дека неговите советници се противат на идејата додека Путин не се согласи на целосен прекин на огнот.
Москва се уште не се согласува на прекин на огнот
NBC пишува и дека не е исклучено Трамп одеднаш да одлучи дека сепак сака да разговара со рускиот претседател, без оглед на препораките на советниците.
Русија досега не покажа дека е подготвена сериозно да пристапи кон мировниот договор.
Во преговорите со Украина и со САД, руските власти поставија максималистички барања на кои дури ни Америка, а особено Украина, не се подготвени да се согласат.
Киев на 11 март го прифати американскиот предлог за целосен прекин на огнот на 30 дена и рече дека е подготвен веднаш да го спроведе доколку Москва се согласи. Но, руската страна досега го одбиваше.