Последната акција за одлагање на кабаст отпад, која заврши на почетокот на неделава, наиде на поголем одѕив кај граѓаните на Куманово.
Граѓаните на претходно определени локации од стран на Јавното претпријатие „Чистота и зеленило“ можат да одложат кабаст отпад кој потоа ќе биде транспортиран на депонијата без никаков надоместок.
Ваквите акции ги иницира Министерството за животна средина, а Општина Куманово и ЈП „Чистота и зеленило“ ги реализираат во времетраење од пет дена.
– Морам да ги пофалам граѓаните затоа што има зголемен интерес и повеќе смет, значи имаат одговорено на акцијата. Последната акција заврши во вторник, траеше цела недела скоро. Определивме локации различни од претходните и со тој ритам ќе продолжиме. Првин беа во централното градско подрачје, последнава акција беше на три локации, спроти Хотел Сателит во населба Карпош, во Перо Чичо кај Амбуланта и локаци на Романовски пат меѓу улиците „Есперанто“ и „Тоде Мендол“, изјави Ненад Стојановски, директор на „Чистота и зеленило“.
За разлика од претходните акции, вели Стојановски, оваа имаше поголем интерес кај граѓаните, особено во населбата Перо Чичо
– Јас ги охрабрувам граѓаните да продолжат со овие акции, ќе има и во април и ќе ја најавиме таа акција за да го искористат моментот истиот отпад да го одложат бесплатно, кој во нормални услови чини, па нека го искористат тоа, рече Стојановски.
Целта на ваквите акции е граѓаните да не се ослободуваат од кабастиот отпад со непрописно одлагање со што се создаваат диви депонии.
Никола Ивановски