Палестинската милитантна група Хамас денеска соопшти дека се обидела да ги задржи во живот израелските затвореници што ги држела во притвор, но дека тие биле убиени од израелската војска на инсистирање на израелскиот премиер Бенјамин Нетанјаху да ја продолжи војната во Газа.
При предавањето на телата на четворицата израелски заложници, Хамас во изјавата рече дека „ги зачувал животите на окупационите затвореници“, дека им дава сè што може и „се однесува хумано кон нив, но дека биле убиени од нивната војска заедно со киднаперите“, објави Ал Џезира.
„Злосторникот Нетанјаху денес плаче над телата на затворениците кои му беа вратени во ковчези, во очигледен обид да ја избегне одговорноста за нивното убиство пред својата јавност“, додаде Хамас.
Обраќајќи им се на семејствата на убиените израелски затвореници, семејствата Бибас и Лифшиц, Хамас изјави дека би сакал нивните синови да се вратат кај нив живи, но дека израелската армија и израелските лидери одлучиле да ги убијат наместо да ги вратат.
Телата на четворицата убиени израелски заложници се предадени на израелските одбранбени сили во Појасот Газа, објави „Тајмс оф Израел“.
Телата претходно му беа предадени на Црвениот крст од страна на палестинската милитантна група Хамас.
На местото на предавањето ќе се одржи кратка воена церемонија, а потоа телата ќе бидат однесени во Израел за идентификација.
За време на предавањето на телото, можеа да се видат различни транспаренти, вклучително и оној на кој е прикажан Палестинец со палестински кефиј и стапала вкоренети во земјата Газа, со разни воени тенкови и борбени авиони пред него, а израелски ковчези зад него, објави Ал Џезира.
На друг транспарент пишуваше „Воениот злосторник Нетанјаху и неговата нацистичка армија ги убија со проектили од ционистички воени авиони“.
Кабинетот на израелскиот премиер Бенјамин Нетанјаху претходно денеска објави дека телата на мајката и нејзините две деца – Шири, Ариел и Кфир Бибас, како и Одед Лифшиц – ќе ѝ бидат предадени на израелската војска.
Портпаролот на Хамас изјави дека четворица заложници биле убиени во израелски воздушни напади, пренесува Танјуг.
Официјален претставник на Хамас рече дека групата е подготвена да ги ослободи сите преостанати заложници истовремено за време на втората фаза од прекинот на огнот со Израел.
Хамас претходно оваа недела објави дека ќе ги предаде телата на Шира Бибас (32) и нејзините две деца – четиригодишната Ариел и деветмесечната Кфир, кои биле на таа возраст кога биле киднапирани.
Таткото на децата, Јарден, беше киднапиран одделно и ослободен на 1-ви февруари.
Палестинската група Исламски џихад го држеше 83-годишниот Одед Лифшиц.
Неговата сопруга, Јочевед, беше киднапирана одделно тој ден, а Хамас ја ослободи 16 дена подоцна.
Лифшиќ беше новинар и страстен застапник на човековите права, пренесува Танјуг.