Портпаролката на руското Министерство за надворешни работи Марија Захарова денеска изјави дека воените договори предложени од украинскиот претседател Володимир Зеленски ќе бидат „билет во еден правец“ за Украинците на возраст од 18 до 24 години.
„Дали некој се сомнева што е овој договор? Тоа е само билет во еден правец. Ова е веќе последната точка“, изјави Захарова за руското радио Спутник.
Според неа, оние што ќе го потпишат договорот всушност нема да добијат никакви професионални вештини, па дури и борбена обука во вооружените сили на Украина.
Во украинската армија можат само да очекуваат да бидат претворени во топовско месо“, нагласи Захарова, пренесува Танјуг.
Таа оцени дека следната цел на режимот во Киев би можеле да бидат децата.
Захарова потсети дека „Украина долго време негува омраза кон Русите меѓу малолетниците“.
„Верувам дека една од задачите на Зеленски, поставена пред него… од сите зад неговата фигура, е уништување на украинскиот народ“, заклучи Захарова.
Украинската влада одобри нов систем на едногодишен договор за воени доброволци на возраст од 18 до 24 години, со потенцијален годишен приход до два милиони украински гривни (околу 50.000 евра), соопшти вчера канцеларијата на украинскиот министер за одбрана Рустем Умеров.
Зеленски неодамна во интервју за Ројтерс објави дека планира да привлече млади луѓе на возраст од 18 до 24 години во Вооружените сили на Украина (АСУ) преку специјални договори, кои предвидуваат посебни бенефиции и висока финансиска поддршка.
Тој потоа прецизираше дека договорот предвидува еден милион гривни (малку повеќе од 24.000 долари), бесплатен прием на универзитет без полагање испити, како и посебни услови за станбени кредити.
Зеленски истакна дека мобилизацијата на лица постари од 25 години во Украина е недоволна за да се задоволат сите потреби на фронтот и дека земјата, во услови на вонредна состојба, мора да ги мобилизира сите расположливи ресурси.
Украинскиот лидер на 15 јануари потпиша закон со кој се регулира вклучувањето на 17-годишниците во воениот регистар.