Украинскиот претседател Володимир Зеленски реагираше на идејата на американскиот претседател Доналд Трамп нудејќи партнерство околу украинските резерви на ретки метали и минерали.
Да потсетиме, претходно оваа недела Трамп објави дека сака Украина да испорача клучни ресурси на САД во замена за финансиска помош.
„Ако зборуваме за договор, тогаш ајде да се договориме, ние сме за тоа“, рече Зеленски во синоќешното интервју за Ројтерс.
Иако нагласи дека Киев не предлага „да ги даде своите ресурси“, тој истакна дека е отворен за партнерство.
Украина – земја богата со ретки минерали и метали
Ретките земјини метали се група од 17 елементи кои се клучни во производството на високотехнолошки магнети, електрични мотори и електроника за широка потрошувачка.
Зеленски истакна дека Украина има најголеми резерви на титаниум и ураниум во Европа.
Според Светскиот економски форум, Украина би можела да стане клучен снабдувач на литиум, берилиум, манган, галиум, циркониум, графит, апатит, флуор и никел.
Прикажувајќи мапа на украински наоѓалишта, Зеленски рече дека Русија во моментов контролира помалку од 20 отсто од овој тип на украински минерални ресурси, но тоа вклучува и околу половина од украинските резерви на ретки метали.
„Путин не само што зграпчува земја“
„Путин не само што зграпчува земја, туку веднаш размислува како да ги сподели овие ресурси со сојузниците како Северна Кореја и Иран“, рече Зеленски.
„Тоа веќе им нуди пристап“, додаде тој.
„Украина е многу богата земја. Тоа не значи дека не би дале нешто на некого, дури ни на стратешки партнери. Зборуваме за партнерство… Да го развиеме заедно, да заработиме пари и што е најважно, да ја гарантираме безбедноста на западниот свет“, рече Зеленски.
„Трамп мора прво да разговара со мене, па дури потоа со Путин“
Зеленски додаде дека Киев и Белата куќа ја разгледуваат можноста за складирање на американскиот течен природен гас (LNG) во подземни складишта во Украина, што тој го нарече „многу интересен проект“.
Тој, исто така, ја изрази својата желба САД да имаат приоритет во обновата на Украина, нагласувајќи дека тоа ќе значи „големи можности и профит за американските компании“.
Зеленски истакна дека е клучно Трамп прво да разговара со него, а потоа со рускиот претседател, во спротивно тоа ќе изгледа „како разговор за Украина без Украина“.
„Не знам за какви компромиси може да се разговара на преговарачката маса, бидејќи сè уште не сме стигнале до таа точка“, рече Зеленски.
„Важно е луѓето да разберат дека Украина преговара, а не прифаќа ултиматуми од Русија“, додаде тој.
Трамп најави средба со Зеленски
Тој изјави дека на Украина и се потребни безбедносни гаранции од сојузниците како дел од секој договор.
Трамп најави можност за средба со Зеленски во Белата куќа веќе следната недела, што ќе биде нивна прва средба по нивната последна средба во Њујорк минатата година.
Во исто време, Трамп повтори дека сака да се сретне со рускиот претседател, со кого, како што вели, „секогаш има добри односи“.
„Би сакал таа војна да заврши, едноставно од човечка перспектива. Тоа е бесмислена војна и би сакал да заврши“, изјави Трамп за новинарите за време на средбата со јапонскиот премиер Шигеру Ишибаши.
Севернокорејските војници се враќаат на фронтот
Зеленски во интервју за Ројтерс додаде дека илјадници севернокорејски војници се вратиле во регионот Курск во Русија за да се борат против украинските сили.
Службеник на украинските специјални сили со кодно име „Пулс“ минатиот месец изјави за „Скај њуз“ дека севернокорејските војници се привремено повлечени од линијата на фронтот откако претрпеа големи загуби.
„Тие беа видени како се разнесуваат со гранати за да избегнат апсење“, тврди Пулс.