Азиските берзи утрово пораснаа, враќајќи дел од вчерашните загуби, бидејќи Вашингтон го одложи воведувањето царини за Канада и Мексико, но Кина најави царини за увоз од САД.
Јапонскиот индекс Никеи во 7 часот утрото порасна за 0,8 отсто, додека цените на акциите во Јужна Кореја и Хонг Конг пораснаа меѓу 1,1 и 1,8 отсто.
Во Австралија, пак, тие благо паднаа. Кинеските берзи се уште се затворени поради прославата на Лунарната Нова Година.
Инвеститорите охрабрени од вестите за договорот на Канада и Мексико со Вашингтон
Азиските инвеститори беа охрабрени од веста дека Канада и Мексико постигнале договор со Вашингтон за одложување на воведувањето царини за еден месец.
Така, берзите повратија дел од загубите од вчера, кога беа потресени од одлуката на американскиот претседател Доналд Трамп да воведе царини од 25 отсто на увозот од Канада и Мексико.
Сепак, утрово во САД стапија на сила царините од 10 отсто за увоз од Кина.
Пекинг возвраќа
Пекинг веднаш возврати со најава на дополнителни царини од 15 отсто за јаглен и течен природен гас од САД, како и царини од 10 отсто за сурова нафта, земјоделска опрема и одредени автомобили од 10 февруари.
Додека фјучерсите на американските и европските берзански индекси беа во пораст по вчерашните добри вести од Канада и Мексико, тие утрово повторно се во пад бидејќи инвеститорите стравуваат од трговска војна меѓу САД и Кина, слична на онаа од првиот мандат на Трамп.
Белата куќа објави дека Трамп во наредните денови ќе разговара со кинескиот претседател Си Џинпинг.
„Мислам дека треба да се навикнеме на ова, еден вид ролеркостер на јавни преговори за тарифи и други политики“, вели Рос Мејфилд, аналитичар во Baird.
Доларот слабее, цената на нафтата паѓа
И на валутните пазари падна вредноста на доларот во однос на кошницата со валути.
Индексот на доларот, кој ја покажува вредноста на американскиот долар во однос на другите шест најважни светски валути, утринава се движи околу 108,90 поени, додека вчера во овој момент изнесуваше 109,65 поени.
Курсот на доларот во однос на јапонската валута се лизна од вчерашните 155,55 на 155,25 јени.
Американската валута ослабе и во однос на европската, па цената на еврото достигна 1,0290 долари, додека вчера во овој момент изнесуваше 1,0240 долари.
Цените на нафтата сепак нагло паднаа откако Вашингтон го одложи воведувањето царини за Мексико и Канада.
Цената на барелот на лондонскиот пазар утринава се лизна за 1,08 отсто, на 75,15 долари, додека на американскиот пазар барелот поевтини за 1,70 отсто, на 71,90 долари.