Украинскиот претседател Володимир Зеленски во интервју за полската телевизија ТВН24 изјави дека постои шанса војната на Русија против Украина да заврши оваа година со поддршка на САД и Европа.
Како што пренесува „Украинска правда“, на прашањето на полските новинари за веројатноста војната да заврши во 2025 година, Зеленски одговорил самоуверено, велејќи дека тоа е можно.
„Трамп сака да стави крај на војната. Тој има способност да изврши притисок врз Русија. Убеден сум дека Русија се плаши и од САД и од Кина“, рече Зеленски.
Украинскиот претседател нагласи дека Трамп мора на Украина да ѝ понуди конкретни безбедносни гаранции кои не само што ќе ѝ користат на Европа, туку и ќе испрати порака до Русија дека Украинците, заедно со другите нации, можат да се одбранат доколку Путин повторно се обиде да предизвика војна.
„Трамп може да ја натера Русија да ја прекине војната. Мораме да се погрижиме Трамп да обезбеди јасни безбедносни гаранции за Украина и да го принуди Путин да се вклучи во дипломатијата за да се стави крај на оваа војна“, рече тој.
Зголемување на домашното производство на оружје
Тој исто така посочи дека Украина во моментов има силни партнери како што се САД и Европската унија, кои значително го зголемија сопственото производство на оружје.
Зеленски истакна дека ЕУ треба дополнително да го зголеми производството на оружје „за себе“ за Русија да разбере дека Европа има средства да се брани, што ќе и овозможи „да го удри Путин онаму каде што најмногу боли“.