Пет години по коронавирусот, во Кина се зголемува бројот на заболени слични на грип. Очекувано, оваа вест предизвика паника низ светот.
Некои медиуми објавија за преполни болници и непотврдени видеа кружат на социјалните мрежи на кои наводно се гледаат полни чекални и пациенти со маски.
За што всушност се работи, за каков вирус се работи и има ли простор за паника?
Случаите на ХМПВ се зголемуваат во северна Кина, но експертите велат дека ризикот од нова пандемија слична на Ковид-19 е многу низок.
Што е метапневмовирус (ХМПВ)?
ХМПВ е респираторно заболување кое предизвикува симптоми слични на грип или настинка, но може да го зголеми ризикот од посериозни компликации, како бронхитис или пневмонија, особено кај постарите, малите деца и луѓето со ослабен имунолошки систем, пишува Гардијан.
Оваа болест припаѓа на истата фамилија како респираторниот синцицијален вирус (РСВ) и е позната од 2001 година, кога за прв пат беше идентификувана во Холандија.
Епидемиите на HMPV имаат тенденција да бидат почести за време на постудените сезони.
Зошто HMPV се споменува во последните денови?
Според локалните власти, бројот на случаи на ХМПВ се зголемува во северна Кина, особено кај децата.
Кинескиот Центар за контрола и превенција на болести (ЦДЦ) ги предупреди граѓаните да бидат внимателни и да се придржуваат до правилата за хигиена, но ги отфрли тврдењата на интернетот за преоптоварени болници и заканата од нова пандемија слична на Ковид-19.
– Респираторните инфекции обично го достигнуваат врвот во зима. Овие болести изгледаат помалку сериозни и се шират во помал обем во споредба со претходните години – изјави портпаролката на кинеското Министерство за надворешни работи, Мао Нинг.
Експертите веруваат дека очигледното зголемување на бројот на случаи може делумно да се должи на напредокот во технологијата, што овозможува полесно откривање и идентификација на HMPV.
– Мислам дека сега сме повнимателни околу избувнувањето на епидемии. Луѓето станаа хипервнимателни, а името „човечки метапневмовирус“ звучи прилично страшно – вели д-р Жаклин Стивенс, предавач на Универзитетот Флиндерс во Австралија.
Колку е опасен HMPV?
Симптомите на HMPV се слични на настинка или грип и често се класифицирани како „обична настинка“, објаснува д-р Стивенс.
За разлика од болестите како корона или грип, HMPV не е болест за која се известува за здравствените власти.
Кои групи се најзагрозени?
HMPV може да доведе до посериозни болести, како што се бронхитис и пневмонија, кај постари лица, многу мали деца и луѓе со ослабен имунолошки систем.
„Овој вирус секако може и предизвикува сериозни болести, поради што е важно луѓето да знаат дека постои“, рече професорот Пол Грифин, директор за заразни болести во здравствените служби Матер во Бризбејн.
Сепак, во моментов нема вакцини или специфични антивирусни лекови за HMPV, иако вакцините се во развој.
„Единствениот начин да се бориме со него е да се едуцираат луѓето и да се намали преносот“, додаде Грифин.
Дали има некоја причина за грижа?
ХМПВ не е како Ковид-19 бидејќи постои со децении, што значи дека светската популација има развиено одредено ниво на имунитет од претходните инфекции, истакнуваат експертите.
За разлика од Ковид кој беше сосема нова болест за човечкиот имунолошки систем, ХМПВ не е способен да предизвика пандемија од слични размери.
– Мислам дека не треба да бидеме загрижени за пандемијата на овој вирус, но зголемувањето на бројот на случаи и неговото влијание се значителни. Можеме да научиме од пандемијата „Ковид-19“ како да го намалиме ширењето, особено ако се има предвид дека немаме вакцини или антивирусни лекови за ХМПВ – рече Грифин.