Украинскиот претседател Владимир Зеленски синоќа изјави дека на рускиот претседател Владимир Путин не му е потребен крај на војната бидејќи „сака да ја ескалира ситуацијата за новоизбраниот американски претседател Доналд Трамп да не може да стави крај на војната меѓу Русија и Украина“.
Тој потсети дека Путин вчера во Казахстан повторно рекламирал руски ракети и „подготвеност за убивање и уништување“.
– Путин очигледно сака да додаде илјадници и илјадници проектили кои веќе ја погодија Украина. Нему не му треба крај на оваа војна. Освен тоа, Путин сака да ги спречи другите да ја прекинат оваа војна. Тој сега може да мавта со „Орешник“ само за да ги фрустрира напорите на претседателот Трамп, што секако ќе се случи по инаугурацијата. Путин сега сака да ја ескалира ситуацијата за Трамп да не направи ништо и да не може да ја заврши војната – истакна Зеленски во синоќешното видео обраќање, пренесува Укринформ.
Според него, Путин е единствениот виновник за оваа војна и единствениот кој верува во војна.
– И затоа сегашната ескалација на Путин е притисок подоцна да го принуди американскиот претседател да се согласи со условите на Русија – рече Зеленски.
Тој ги повика сите Украинци да се засолнат кога има воздушни напади и ракетни закани.
– Ова е цврсто правило – правило кое не зависи од одредени изјави на Русија. Сега може да има уште повеќе руски обиди да сее страв и очај во Украина. На сите ни треба издржливост за да го поминеме сето тоа. И потребно е единство – со сите партнери – изјави Зеленски.
Според него, Путин сега го прави она што секогаш го прави – „заплашува, дели, се обидува да ги скрши или потресе сите поединечно“.
– Не може веќе ништо. Тој губи кога е сам. И сега мора да загуби. Во сè. И ќе биде безбедно за сите – рече Зеленски, коментирајќи ја изјавата на рускиот претседател на самитот на Организацијата на Договорот за колективна безбедност (ОДКБ) во Астана дека целите на новите балистички ракети „Орешник“ може да бидат „одлучувачки центри во Киев“.