Соединетите Американски Држави во средата, 4 септември, го санкционираа главниот уредник на руската државна телевизиска мрежа РТ и уште девет други за, како што рече, обиди за мешање во претседателските избори.
Американското Министерство за финансии објави дека главната уредничка на RT, Маргарита Симоновна Симонјан и уште девет лица кои ја сочинувале мрежата тајно регрутирале влијателни луѓе на социјалните мрежи со цел да влијаат на американското јавно мислење и да шират проруски пораки, пренесува Хина.
ФБИ одделно побара судска дозвола за затворање на 32 интернет домени за кои американската влада рече дека се вклучени во напорите за „злонамерно странско влијание“, вклучително и обиди да се поткопа јавната поддршка за американската помош за Украина во нејзината војна со Русија.
Веста доаѓа непосредно пред државниот обвинител Мерик Гарланд да зборува на состанокот на работната група за изборни закани на американското Министерство за правда.
„Ќе бидеме немилосрдно агресивни во спротивставувањето и попречувањето на обидите на Русија и Иран, како и на Кина или кој било друг странски злонамерен актер, да се меша во нашите избори и да ја поткопа нашата демократија“, рече Гарланд пред состанокот за заканите за изборите во САД.
Руската амбасада во Вашингтон не одговори веднаш на барањата за коментар. Москва постојано повторува дека не се мешала во американските избори.
Министерството за правда претходно предупреди дека Русија останува закана за претседателските избори.
Американски официјални лица изјавија дека Русија не ги променила своите преференции од претходните претседателски избори во САД, што покажува дека Москва го фаворизира Доналд Трамп.
Проценките на американските разузнавачки служби покажаа дека Москва се обиде да му помогне на Трамп во 2016 година кога ја победи демократката Хилари Клинтон и во 2020 година кога загуби од демократот Џо Бајден. Москва ги отфрли тие обвинувања.
Лиза Монако, друг претставник на Министерството за правда, минатиот месец рече дека рускиот претседател Владимир Путин и неговите блиски соработници усвоиле сè пософистицирани техники, насочени кон одредени групи гласачи и оние во високо поларизирани држави.
Министерството за правда во јули соопшти дека ја затворило руската кампања на социјалните мрежи поврзана со RT која тајно шири про-Кремљ пораки.
Американската влада, исто така, го обвини Иран дека се обидува да влијае на претстојните избори преку сајбер операции против двете кампањи.
Разузнавачките агенции процениле дека Кина не планира да интервенира во претседателската трка за да фаворизира еден кандидат.
Портпаролот на Белата куќа изјави дека Путин знаел за руското мешање во американските избори.
„Тој знаеше за активностите на РТ“, изјави Џон Кирби.