На азиските берзи цените на акциите паднаа, како и на Волстрит претходниот ден, додека вредноста на доларот во однос на кошницата валути падна на најниско ниво оваа година, бидејќи се очекува намалување на каматните стапки од страна на американската ФЕД.
Индексот MSCI на азиско-пацифичките акции, без јапонските акции, во 07:00 часот беше на минус 0,4 отсто, лизгајќи се од највисокото ниво за еден месец.
Истовремено, на токиската берза индексот Никеи ослабе за 0,2 отсто, додека цените на акциите во Австралија, Јужна Кореја, Шангај и Хонг Конг паднаа меѓу 0,2 и 1 отсто.
Така, азиските берзи го следат вчерашниот пад на Волстрит, кога Dow Jones се лизна за 0,15 отсто, S&P 500 0,2 отсто, а Nasdaq индексот 0,3 отсто.
По осум дена раст, S&P 500 и Nasdaq индексот вчера благо паднаа бидејќи немаше нови вести за поддршка на растот на цените на акциите.
Меѓу 11-те најважни сектори на индексот S&P 500, цените на акциите најмногу паднаа во енергетскиот сектор, во просек за 2,7 отсто, додека добитниците ги предводеше трговскиот сектор со раст од 0,5 отсто.
Пазарот долго време е поддржан од верувањето на инвеститорите дека американската централна банка ќе почне да ги намалува каматните стапки во септември, со оглед на тоа што инфлацијата во САД се намалува.
Се очекува дека ФЕД ќе ги намали каматните стапки за 0,25 процентни поени, но има и такви кои се обложуваат дека намалувањето ќе биде значително поголемо – за 0,50 процентни поени.
Затоа со нетрпение се очекува говорот на претседателот на ФЕД Џером Пауел во петокот на состанокот на централните банкари во Џексон Хол.
„Главното прашање е дали ФЕД ќе ги намали каматните стапки за 0,25 или 0,50 процентни поени во септември. Инвеститорите ќе ги читаат коментарите на Пауел меѓу редови за да видат колку агресивно ќе биде првото намалување на каматните стапки на ФЕД“, вели Чак Карлсон, директор во Хоризон Инвестмент Сервисс.
Доларот под притисок, цената на нафтата паѓа
На валутните пазари, пак, вредноста на доларот во однос на кошницата валути падна на најниско ниво оваа година.
Индексот на доларот, кој ја покажува вредноста на американскиот долар во однос на другите шест најважни светски валути, утринава се движи околу 101,34 поени, додека вчера во ова време изнесуваше 101,85 поени.
Истовремено, курсот на доларот во однос на јапонската валута потона од вчерашните 146,50 на 144,95 јени.
Американската валута ослабе и во однос на европската, па цената на еврото достигна 1,1130 долари, највисоко ниво годинава, додека вчера во овој момент беше 1,1080 долари.
Цените на нафтата, пак, благо паднаа. Цената на барелот на лондонскиот пазар утрово се лизна за 0,13 отсто, на 77,10 долари, додека на американскиот пазар цената на барелот се намали за 0,19 отсто, на 73,05 долари.