Во текот на ноќта руските сили го извршија најголемиот напад на Киев оваа година, а украинската противвоздушна одбрана собори повеќе од 40 дронови над главниот град, додека над цела Украина беа соборени околу 89 беспилотни летала и еден проектил.
Засега нема информации за жртви или штети, пишува Киев Индипендент.
Шефот на Воената управа на градот Киев, Серхи Попко, најави дека ова е еден од најзначајните напади од почетокот на инвазијата и дека руските сили се обидуваат со нови тактики да го погодат главниот град на Украина.
„Агресорот пробува нова тактика – бара вистинско време, методи и средства да го погоди Киев“, напиша Попко на Телеграм.
Во исто време, руското Министерство за одбрана соопшти дека во текот на ноќта во шест руски региони биле соборени 19 украински беспилотни летала, што е окарактеризирано како обид за терористички напад, пренесува РИА Новости.
„Дежурните системи за противвоздушна одбрана пресретнаа и уништија 11 беспилотни авиони над Белгород, четири над Брјанск и по еден беспилотен авион над Курск, Калушка, Ростовска област и Република Крим“, се вели во соопштението.
Министерството додаде дека е уништена и ракетата Нептун-МД над регионот Курск.