Вкупната популација на Јапонија во 2023 година опаѓа 15-та година по ред, за повеќе од половина милион луѓе, поради стареењето на населението и намалениот број на новороденчиња, покажуваат податоците на Министерството за внатрешни работи.
Бројот на раѓања во Јапонија минатата година достигна рекордно ниско ниво од 730.000, а имаше 1,58 милиони смртни случаи.
Јапонија сега има население од 124,9 милиони, според АП.
Бројките објавени од јапонското министерство во средата, исто така, покажаа дека зголемувањето на бројот на странски жители за 11 отсто помогнало бројот на странци на островот да се зголеми на над три милиони за прв пат.
Тие сега сочинуваат речиси три отсто од вкупното население и претежно се работоспособни, на возраст меѓу 15 и 64 години.
Истражувањата покажуваат дека помладите Јапонци не сакаат да стапат во брак и да имаат деца, поради послабите можности за работа, високите животни трошоци, кои растат побрзо од платите и корпоративната култура која им става дополнителен товар на жените и мајките кои работат.
Владата одвои 5,3 трилиони јени (34 милијарди долари) како дел од својот буџет за 2024 година за финансирање на стимулации за младите парови да имаат повеќе деца, како што се зголемените субвенции за грижа и образование, и се очекува да потроши 3,6 трилиони јени (23 милијарди долари) во даноци годишно во следните три години.
Експертите наведуваат дека овие мерки главно се наменети за брачните двојки кои планираат да имаат или веќе имаат деца и дека не се однесуваат на се поголемиот број млади кои не сакаат да стапат во брак.
Се предвидува населението на Јапонија да се намали за околу 30 отсто на 87 милиони до 2070 година, кога четири од секои 10 луѓе ќе имаат 65 или повеќе години.