Војската на Јужна Кореја продолжи да емитува пропагандни преноси против Пјонгјанг преку звучници насочени кон Северна Кореја, откако земјата повторно испрати балони за ѓубре преку границата, изјавија извори во Сеул за новинската агенција Јонхап, пренесе Танјуг.
Војската на Јужна Кореја предупреди дека може да го зголеми бројот на звучници и да се префрли на емитување „целосно“ доколку Северна Кореја продолжи со своите провокации, вклучително и испраќање балони со ѓубре преку граница.
Изворите рекоа дека во првиот круг на пропагандни преноси учествувале звучници во близина на западниот дел на силно утврдената граница меѓу Јужна и Северна Кореја.
Војската на Јужна Кореја соопшти дека од четвртокот открила околу 200 балони со остатоци, од кои околу 40 слетале во областа околу јужнокорејската престолнина Сеул.
Психолошка војна
Јужна Кореја почна да емитува пропаганда преку звучници минатиот месец.
На 9 јуни, Јужна Кореја почна да емитува вакви преноси за прв пат по шест години како одговор на испраќањето балони со ѓубре.
По емитувањето на 9 јуни, Северна Кореја предупреди дека ќе одговори на таква форма на психолошка војна, која, како што наведе, претставува „вовед во многу опасна ситуација“.
Северна Кореја испрати повеќе од 2.000 балони со ѓубре на Југот во осум наврати од крајот на мај, како што рече, како одмазда за Јужна Кореја што испрати летоци против Пјонгјанг.