Унгарскиот премиер Виктор Орбан во петокот изјави дека поранешниот американски претседател Доналд Трамп и словачкиот премиер Роберт Фицо биле нападнати поради „спротивставени ставови“.
Фицо беше погоден со четири куршуми во обид за атентат во средината на март, додека Трамп беше лесно ранет во увото во обид за атентат на 13 јули.
„Сите овие напади се насочени кон политичарите кои се против војната и се залагаат за мир“, изјави Орбан за државното радио Кошут.
„Провоените сили се толку возбудени, напнати, охрабрени и толку организирани што се обидуваат да ги отстранат од сцената, од центарот на политичкиот живот, оние сили кои се залагаат за мир“, додава Орбан.
Тој претходно изјави дека Трамп го преживеал нападот затоа што „Бог има план со него“ да промовира мир.
Неговиот министер за надворешни работи, Петер Сијарто, рече дека Унгарија го гледа можниот втор мандат на Трамп како „шанса за мир“ во Украина.
Орбан е во добри односи со Трамп од неговата победа на претседателските избори во САД во 2016 година.
По средбата со Трамп пред една недела, набргу по присуството на самитот на НАТО во Вашингтон, Орбан сподели фотографија од нивниот состанок во одморалиштето Мар-а-Лаго на Трамп во Флорида на Платформа Х со натпис:
„Мировна мисија 5.0. Разговаравме за начините за постигнување мир. Добрата вест на денот: Тој ќе го реши тоа!“.