Илјадници украински бегалци во Велика Британија се во опасност од бездомништво и експлоатација, соопшти денеска британскиот Црвен крст.
Извештајот на хуманитарната организација покажа дека иако плановите на британската влада генерално обезбедуваат спас за семејствата кои бараат азил, некои Украинци се соочиле со слабости во процедурите за заштита и недостаток на доволна обука и постојана поддршка за домаќините, пишува Гардијан.
Почнувајќи од 2022 година, повеќе од 9.000 од околу 200.000 семејства сместени во Велика Британија биле изложени на ризик од бездомништво, најчесто поради распаѓање на односите со семејствата и тешкотии при пристап до пазарот на приватни станови.
Утврдено е дека Украинците имаат четири пати поголема веројатност да доживеат бездомништво отколку општата популација.
Помеѓу февруари и средината на јуни 2024 година, во просек имало 379 нови пристигнувања од Украина неделно.
Два брода кои биле користени во Глазгов и Единбург за сместување на вкупно 2.465 луѓе во периодот од јули 2022 година до јули 2023 година, се прогласени за несоодветни поради недостаток на капацитети за готвење, пренесува Танјуг.
Во извештајот се наведени загрижувачки примери за семејна шема за сместување каде што една Украинка била замолена да замине на полноќ и спиела на плажа со своите работи, додека на друга ѝ било понудено сместување преку интернет што било поставено за сексуална експлоатација со брава од надворешната страна и видео камери во спалната соба.
Едно семејство кое учествува во шемата за семејно сместување имало три генерации членови кои делеле еден кревет, се вели во извештајот.
Црвениот крст бара подобри заштитни аранжмани за семејните шеми за сместување и поголема помош за раселените лица за пристап до приватниот сектор за изнајмување, подобра понуда на прифатливи станови и национална стратегија за интеграција која промовира еднаква поддршка за сите раселени лица.