Министерката за надворешни работи на Германија, Аналена Бербок, пред посетата на Словенија изјави дека земјите од Западен Балкан целосно припаѓаат на Европската унија и дека целта на Германија е зајакнување на ЕУ, во која ќе бидат вклучени и земјите од регионот.
„Во свет каде што кризите и конфликтите се преклопуваат во непосредното соседство на Европа, ни треба Европска Унија која ќе дејствува брзо и одлучно утре и задутре и ќе остане безбедносно сидро за сите нас во Европа. Германија и Словенија се обединети во зајакнувањето на нашата заедничка Европа, правејќи ја погодна за иднината и вклучувајќи ги земјите од Западен Балкан меѓу нас. За нас силната Европска унија, исто како НАТО, е незаменливо животно осигурување во неизвесни времиња“, се вели во соопштението на Баербок објавено на веб-страницата на германското Министерство за надворешни работи, пренесува Танјуг.
Таа рече дека земјите од Западен Балкан „целосно и апсолутно“ припаѓаат на Европската унија.
Безбедносен интерес
„Ова не се само празни зборови. Тоа е во наш безбедносен интерес – во Љубљана, во Берлин и во цела Европа. За да се постигне ова, мора да се завршат неопходните реформи во земјите кои сакаат да станат дел од европското семејство. Во исто време, ЕУ мора да го одржи зборот и да преземе чекори во процесот на проширување, кога ќе бидат исполнети условите“, рече Баербок.
Таа додаде дека поради „рускиот империјализам во срцето на Европа“, ЕУ не може да си дозволи „сиви зони“.
„Заедно со Словенија работиме на реформи во ЕУ со цел да го поставиме курсот за проширена Унија. Напредокот во политиката на проширување и внатрешните реформи на ЕУ мора да одат рака под рака“, нагласи шефот на германската дипломатија.