Портпаролот на Движењето ЗНАМ – За наша Македонија, Никола Мемов, на денешната прес-конференција упати серија обвинувања и прашања кон Социјалдемократски сојуз на Македонија и лидерот Венко Филипче, оценувајќи дека нивното однесување во однос на измените на Законот за Влада е „длабоко неодговорно и деструктивно“.
Мемов истакна дека „во изминативе денови сведоци сме на уцени и на еден длабоко неодговорен и деструктивен однос од страна на СДСМ и Венко Филипче, особено во контекст на измените на Законот за Влада“, додавајќи дека со предложените измени е јасно предвидено техничката влада да важи за следните парламентарни избори, а потоа да биде укината како модел.
Според него, овој концепт веќе ја исполнил својата функција и нема место во современите европски демократии. Притоа, Мемов ги отфрли обвинувањата дека техничката влада ќе биде укината веднаш, нагласувајќи дека „сите тврдења дека техничката влада се укинува веднаш, како и дека ова решение е донесено без консултации со политичките партии, се обична лага и претставуваат обид за манипулација со јавноста“.
Од ЗНАМ велат дека наместо конструктивен политички пристап, СДСМ избрала конфронтација и блокади, а како последен пример го посочија најавеното повлекување од работната група за новиот Изборен законик.
Во тој контекст, Мемов јавно праша: „Дали следниот чекор е напуштање на законодавниот дом од страна на пратениците на СДСМ, со крајна цел бојкот на следните парламентарни избори?“
Тој отвори и дилема дали ваквите потези се резултат на страв од изборен пораз, прашувајќи дали причината е „стравот од соочување со граѓаните и од извесен, катастрофален изборен пораз“, по кој, како што рече, би следувала и оставка на Филипче од лидерската позиција.
Во своето обраќање, Мемов испрати и порака дека „државата не смее да биде заложник на ничии политички калкулации“, потенцирајќи дека е неопходно политичките чинители да покажат одговорност и да носат одлуки во интерес на државата.
„Македонија заслужува стабилност, достоинство и напредок, и ние ќе продолжиме да работиме токму за таква иднина“, рече Мемов.
Од ЗНАМ упатија и директен повик до членството и симпатизерите на СДСМ, предупредувајќи: „Бидете внимателни! Не дозволувајте да бидете вовлечени во сценарија што водат кон изолација, кон уништување на партијата, слабеење на институциите и оттргнување на државата од европскиот пат“.
Во обраќањето беше оценето и дека актуелното раководство на СДСМ ја довело партијата до, како што рече Мемов, „историски најнизок рејтинг, на ниво од едвај нешто над 5%“, предупредувајќи дека ваквиот пристап може дополнително да ја маргинализира партијата.
Дополнително, ЗНАМ упати апел и до пратениците и градоначалниците од редовите на СДСМ да не бидат, како што рече Мемов, „инструмент во стратегии што водат кон слабеење, изолирање и непостоење на партијата“.
Одговарајќи на новинарско прашање за Законот за двојно државјанство, Мемов посочи дека ставот на партијата ќе биде соопштен по завршување на јавната дебата.
„Најавено е дека ќе има стручна и научна дебата во јавноста по ова прашање и кога ќе го имаме конечниот текст ЗНАМ ќе се произнесе по ова прашање во јавноста“, изјави тој.
Во однос на изборните реформи, Мемов повтори дека официјалниот став на ЗНАМ е идниот парламентарен состав да брои 90 пратеници, со една изборна единица и изборен праг од 2 до 3 проценти.
„Официјален став на ЗНАМ е дека идниот собраниски состав треба да биде со 90 пратеници, да има една изборна единица, изборен праг помеѓу 2 и 3% и да се промени начинот на финансирање на политичките партии“, рече Мемов.